Gweithredwch Nawr! Rheoli Tybaco ar gyfer y Dyfodol

Ynglŷn â'r Gynhadledd

Ysmygu yw'r ffactor sy'n achosi'r nifer fwyaf o farwolaethau ac afiechydon y gellid eu hosgoi yn y Deyrnas Gyfunol. Er bod nifer y bobl sy'n ysmygu yma wedi disgyn yn ystod y 30 mlynedd diwethaf, y mae'n parhau'n rhy uchel. Ar hyn o bryd, 27% o'r boblogaeth sy'n ysmygu.

Mewn rhannau eraill o'r byd, megis Sweden, Awstralia a Chaliffornia, llwyddwyd i ostwng y cyfartaledd hwn i lai nag 20%.

Beth, felly, sy'n cael ei wneud i gyrraedd y ffigwr hwn?

Wedi gwahardd ysmygu mewn mannau cyhoeddus yn y Deyrnas Gyfunol, byddai'n hawdd gorffwys ar ein rhwyfau, gan feddwl nad oes dim mwy y gallwn ei wneud i gyfyngu ar ysmygu.

Ond ni fydd gweithredu yn y dull presennol yn ddigon i sicrhau gostyngiad cyflym yn y defnydd o dybaco.

Cynhadledd ar reoli tybaco yw Gweithredwch Nawr! sy'n gofyn pa gamau y mae'n rhaid i ni eu cymryd i sicrhau lleihad sylweddol yn y defnydd o dybaco a sut mae gweithredu nawr i gyflawni hynny.

Dyma rai o'r cwestiynau allweddol a drafodir yn y gynhadledd:

• Sut gallwn ni gydweithio er mwyn sicrhau gostyngiad yng nghyfartaledd y bobl sy'n ysmygu yn y Deyrnas Gyfunol?
• Beth gallwn ni ei wneud er mwyn cyfathrebu'n well â phob rhan o'n cymdeithas ynglŷn â gwella iechyd?
• Sut mae newid agweddau diwylliannol a herio'r syniad bod ysmygu yn weithred normal?
• Pa welliannau sydd eu hangen er mwyn sicrhau bod gwasanaethau rhoi'r gorau i ysmygu yn cael eu darparu yn llawn ac yn effeithiol?
• Beth yw'r goblygiadau ar gyfer cynhyrchion fferyllol?
• Beth gallwn ni ei wneud er mwyn rhwystro pobl ifanc rhag dechrau ysmygu?
• Beth gallwn ni ei wneud er mwyn cyfyngu ar smyglo sigaréts i'r Deyrnas Gyfunol?
• Pa gamau cyfreithiol a deddfwriaethol sy'n debyg o leihau ysmygu?

Bydd y cynadleddwyr yn cael dysgu am lwyddiannau a phrofiadau heriol arbenigwyr ym maes rheoli tybaco o Awstralia, Sweden a Chaliffornia.

Bydd y gynhadledd hon yn herio ein ffordd o weithio heddiw ac ar gyfer y dyfodol. Bydd yn galw ar bawb gan gynnwys gweithwyr yn y maes, gwneuthurwyr polisi a gwleidyddion i wneud mwy na gweithredu'r gwaharddiad ar ysmygu mewn mannau cyhoeddus. Does dim dwywaith amdani: rhaid i ni i gyd wneud llawer, llawer mwy.